Travagliu à tematica, cunniscenze allargate
L’animali, per un dettu, permettenu di riligà e parolle à famiglie è razze d’animali è insetti :
chì hè u culombu –u culombu hè un acellu ; ci hè un antr’acellu quì ? Iè, ci hè l’acula ! à chì
famiglia appartene l’acula ? L’acula hè un rapace. Ne pudemu ammentà astri, rapaci ? Ci hè a
so carta quì ? alè a li femu allora ! è si dumanda à i zitelli di travaglià à u disegnu è u cerca
parolla in supranacciu è suttanacciu.
Più u livellu di a classa hè altu più e cunniscenze ponu esse specificate, a cartifigura
ghjuchendu quì u so rollu di puntu di partenza, fendu piglià u sbilanciu à a spartera di e
riferenze è organizendu incatenamenti di cunniscenze à avvicinà. I campi ponu esse svariati
assai.
Es : A carta di a ciriola : permette d’ammentà a variatezza tremenda di certi nomi di u lessicu
di l’insetti in corsu, volavulella, ciriola, prunicella, mummù di u nostru signore, vulellu…
Possu entre di più in riferenze è infurmazione ligate li :
Induve si trova a ciriola ? in chì stagione si vede u più ? chì sò i so culori ? Cumu hè fatta ? Cosa
manghja ?
Apre versi d’astri insetti o animali chì a custighjeghjanu o facenu parte di a listessa catena
d’alimentazione…
E pussibbulità sò svariate assai è un ghjocu di cartifigure ci pò permette di custruì è d’aiutà a
custruzzione di parechje seanze è sequenze.
Si pò sempre incalcà u chjodu fendu travaglià i sculari nant’à e so cartifigure persunali ch’elli
elabureghjanu elli stessi, da a più sempiice à a più cumplicata, vole si dì ogni volta si pò ancu
arricà un’infurmazione in più.
Un esempiu : lancemu una carta cù salutà, « salute », « bonghjornu », « cume simu »,
cum’andemu, và bè ?, tuttu bè?, è in casa tutti bè ? Cume và l’anima toia…u scopu quì essendu
d’arricchisce u vucabulariu, fà cresce e cumpetenze linguaghjaghje cù u lessicu.
Itinerariu : u maestru selezziuneghja une poche di cartifigure di i lochi è cù e sflezze, sia à u
tavulone numericu o cù e carte fisiche cù e calamite nant’à u tavulone classicu, indetta u
parcorsu d’un zitellu durante a ghjurnata : u parcorsu pò esse arricchitu cun l’ore, elementi
meteurulogichi…Tocca dopu à u zitellu à fà e so frasi :
Marcellu parte à ott’ore da u so casale, induve và Marcellu ? Và à a scola, u so fratellu và à u
liceu, sortenu à meziornu, vanu à a bibbioteca…
Più u livellu hè altu più e strutture di lingue avvicinate ponu esse numerose o cumplesse. Dopu
à duie o trè lezziò avvicinendu ogni volta una struttura sfarente, si pò fà una valutazione di
l’acquistatu cù e cartifigure : in un eserciziu di riinvestiscimentu si pò per un dettu verificà
induve, quandu, cume…e CARTE permettenu d’avè una cuntestualisazione subitania è
efficace.