Eccu qualchì puema custituitu d'un seguitu di carte. Amusate vi à fà lu scopre è amparà à i vostri elevi. Fate lu illustrà cù e carte scelte o cumplettate da disegni in più.
U sole è a ciriola
Chere à u sole A ciriola : -Unu di i to ragi d’oru U mi voli, u mi voli dà ? -O ciriò !
Vogliu, vogliu, ùn ti ne fà ! Eccu da mè, l’oru d’un ragiu solu per tè !..
-Cusì bellu ùn avia mai vistu...Oooh... Vogliu, ti vogliu ringrazià !
-Vola cun ellu à tutte l’ore Issu ragiu hè unu di u mo core.
L’apa è u fiore
L’apa vene à u fiore Cù a so sporta di matina
Cù u ventu chì cincina Fiore face u rinchinu
L’apa canta un serinatu Ancu ch’ella ùn sia l’ora D’amacu à mazzulellu Fiore n’empie u so spurtellu.
L’acelle benedette
À l’acelle benedette In lu nidu di sott’à u tettu Quattru chjuchi li sò nati...
Ghjattone pesa u capu È stà sottu à pusà Mamma è babbu rundinelle Ùn devenu spustà Ma cumu fà, per a robba à manghjà Ci vole à spiccà u volu !
Chì stà à guardà, ci hè u sole Prupone à i genitori : andate,
eo mi stò ancora s’ellu move un mustacciu u ghjattu l’accecu, d’un ragiu mattu !
U fiume muntagnolu
Issu fiume Hè muntagnolu Ch’in altu monte Hè natu
Ma porta e so acque À ciuttà in grande mare
Hè cusì chì Mediterraniu Chì ci face l’accintu
À noi ci parla Cù l’accentu... Di Monte Cintu.
Cappellu calzette è machjò
Un cappellu U ventu s’arrubbò Chì andà si ne vulia... Incappellatu.
Truvendu una calzetta Di lana calzittata U ventu a s’arrubbò Chì andà si ne vulia... Calzatu.
Passendu per la machja À vulpina scuntrò Si Cacciò u cappellu Per salutà la Ma Vulpina Scherzendu scaccanò
“ ùn fà tante manere Cù u to cappellò O ventu furesteru Voli passà custì Chì a scopa ghjè stretta Povar’à tè... Ti manca una calzetta !”
