Quistioni è riferenze generali in leia cù e carte
Ogni parolla, ogni disegnu, pò esse l’occasione d’un scambiu cù i zitelli, stu spaziu dedicatu vi
permette di riferisce vi à una restituzione orale di e parolle. Pudete sceglie di fà la sente à i
sculari o innò, di ghjuvà vi ne prima o dopu l’interrugazione cù u disegnu di a carta. Hè da
rimarcà chì per e tematiche di a natura è di l’animali, una messa in cuntestu pueticu hè dinò
dispunibule chì hè oralizata quì da zitelli frà 5 è 10 anni segondu u livellu di dificultà di i testi,
iss’arrigistramenti permettenu di travaglià a funetica ma ancu u sensu di a lingua è
l’interpretazione, di ghjucà à scopre d’astre vie (toni, sinonimi, cuntrarii, sensu) segondu u
livellu di scola…
Issu referenziale di quistione hè fattu da aiutà u maestru à almanaccà esercizii è attività à
modu più commudu. Pò permette d’almanaccà, più faciule, vie di sfruttera è di prugressione.
Ciò ch’elle permettenu e cartifigure
Vi permettenu di fà travaglià parechje forme di memoria è tandu d’esse sicuri di purtà risultati
pusitivi à ogni sculare. E memorie chì viaghjanu assai cù u visuale seranu stimulate da e figure
è a scrittura di e parolle quandu quelle chì viaghjanu cù i soni seranu purtate da a parolla, u
puema, u gruppu di frase.
Segondu a dificultà di u lessicu ch’è vo circate à fà amparà è segondu u livellu di i zitelli si
cunsiglieghja d’usà da 5 à 10 cartifigure.
Per i ghjochi, esercizii è attività si cunsiglia di dà e cunsigne in lingua corsa.
E cartifigure aiutanu à un travagliu specificatu nant’à a lingua è a cumunicazione, ma dinò per
un travagliu à tematica, favurizatu da a scumpertera.
L’insegnante, segondu i so bisogni è u so estru, appughjendu si nant’à stu cartulare o creendu
da per sè, pò custruisce attività svariate è ludiche chì piacenu à i zitelli perchè a carta hè
un’elementu di mediazione.
E cartifigure ponu aiutà à tuccà parechji oghjettivi di cummunicazione : parlà di sè stessu, parlà
di l’astri, parlà à l’astri di u so circondu, di cose varie, parlà cun l’astri…
Segondu e scole è i livelli ci vole, u più ch’ellu si pò, à circà d’assucià à u lessicu una funzione
linguaghjaghja. Per un dettu aduprà e carte cù « mi piace », « ùn mi piace » …